Манастырскі корпус Богаяўленскага манастыра

Манастырскі корпус Богаяўленскага манастыра па вуліцы Ніжне-Пакроўскай, 22 (інв. № 250/С-27455). Пабудаваны ў апошняй чвэрці XVIII ст. Цяпер Музей беларускага кнігадрукавання і адміністрацыйны будынак Нацыянальнага Полацкага гісторыка-культурнага музея-запаведніка.

Архітэктура

Двухпавярховы Г-падобны ў плане мураваны будынак. У кампазіцыі галоўнага фасада выкарыстаны характэрны для класіцызму прынцып – першы паверх трактаваны як аснова больш рэпрэзентатыўнага другога паверха, дэкарыраваны рустам і расчлянёны невялікімі лучковымі аконнымі праёмамі ў простых ліштвах з замковым каменем. Па гладкай паверхні сцен другога паверха праходзіць шырокі паясок, прамавугольныя аконныя праёмы ўпрыгожаны ліштвамі. Будынак па перыметру апяразаны развітым прафіляваным карнізам. Вуглавая частка вылучана 4 іанічнымі паўкалонамі, завершана франтонам і акцэнтавана купалам на цыліндрычным барабане. Будынак – помнік архітэктуры барока і класіцызму.