Млын з Бярозаўкі

Млын быў пабудаваны ў 1903—1905 гг. братамі Міхаілам Іванавічам і Іванам Іванавічам Паляковымі ў  в. Бярозаўка Кармянскага раёна Гомельскай вобласці і адносіцца да збудаванняў шатровага (галандскага тыпу). Яго вышыня 14 метраў, збудаванне 5-ці яруснае.

Пры правядзенні калектывізацыі млын стаў калгасным, а яго гаспадары былі высланы ў Сібір.
Млын працаваў  да пачатку 70-х гадоў XX ст., а потым быў у закінутым стане і паступова разбураўся. Паводле ініцыятывы заснавальніка музея «Дудуткі» Яўгена Будзінаса ў чэрвені 1992 года млын быў прывезены на тэрыторыю музея, адноўлены брыгадай цесляроў Віктара Карачуна пад кіраўніцтвам архітэктара Сяргея Сергачова і мастака Барыса Цітовіча.